Leō et aquila bēstiae sunt. Virī et fēminae hominēs sunt.
Mercurius nōn homō, sed deus est.
In aquā sunt piscēs. In āere sunt avēs.
Quid agunt piscēs et avēs? Piscēs in aquā natant, avēs in āere volant.
Avis duās ālās habet, itaque avis volāre potest.
Avis quae volat ālās movet.
Cum homō ambulat, pedēs moventur.
Cum homō spīrat, anima in pulmōnēs intrat.
Homō quī spīrat vīvus est, quī nōn spīrat mortuus est.
Nam sine animā nēmō vīvere potest. Spīrāre hominī necesse est.
Iūlia canit [= cantat]. Iūlia vōcem pulchram habet.
Puerī nīdōs quaerunt. Nīdī sunt inter rāmōs et folia arborum.
In nīdīs avium sunt ōva aut pullī.
Avēs nōn pullōs vīvōs, sed ōva pariunt.
Quīntus in arborem ascendit et IV pullōs videt in nīdō.
Rāmus quī nīdum sustinet tenuis est. Rāmus tenuis puerum crassum sustinēre nōn potest: Quīntus ad terram cadit.
Mārcus eum cadere videt et perterritus est.