Annō sescentēsimō ūndēquīnquāgēsimō [DCXLIX] a.u.c. Rōmānī ingentī interniciōne [= strāge] victī sunt ā Cimbrīs et Teutonibus, quōrum cōpia īnfīnīta [= sine fīne] erat.
Bellum gestum cum sociīs, quī lībertātem sibi asserere volēbant, bellum sociāle dīcitur.
Marius Rōmam ingressus multōs prōscrīpsit et domum Sullae ēvertit.
Spartacus numerōsum [< numerus] exercitum congregāvit [= collēgit] ac variō successū cum Rōmānīs pugnāvit.
Cicerō adulēscēns ōrātōrēs disertōs [= ēloquentēs] audiēbat neque ūllus diēs ab exercitātiōnibus ōrātōriīs vacuus erat.
Cum multārum causārum patrōnus fuisset, Rōmā profectus est, ut ōrātiōnī ferventī [= ārdentī] moderārētur.
Rhodī sē ad Molōnem rhētorem [= magistrum dīcendī] applicāvit .
Bienniō [= II annīs] post revertit ōrātor mūtātus: nōn ācer et abundāns [= redundāns], sed remissus et lēnis [= placidus]. Duo ōrātōrēs tum excellēbant, Cotta et Hortēnsius.
Post quaestūram Siciliēnsem ēloquentia [= ars ōrātōria] Cicerōnis perfecta esse vidēbātur.
In 'Brūtō' Cicerō nārrat dē doctrīnā [< doctor] suā iuvenīlī: sermōnī eius prōpositum est ut industriam et assiduitātem [< assiduus] eius perspiciāmus [= plānē videāmus].
Synōnyma: cōgitātiō et meditātiō; laus et commendātiō; licentia et impūnitās;
fōrma et figūra; dīves et locuplēs; iuvenālis et iuvenīlis;
accūrātus et exquīsītus; morārī et commorārī; exercēre et exercitāre;
ēlūcubrāre et nocte ēlabōrāre; praecipuē et praesertim.
Contrāria: vigor et īnfīrmitās (corporis); remissiō et contentiō.