Cicerō Lūcullō magnam laudem impertīvit [= tribuit]. Is oppida in quibus erant domicilia [= domūs] rēgis et aliās urbēs permultās [= plūrimās] cēpit.
Ut Mēdēa in fugā membra frātris dissipāvisse [= dispersisse] dīcitur, sīc Mithridātēs fugiēns dīvitiās quās in suum rēgnum congesserat [= contulerat] relīquit, quārum collēctiō [< colligere] Rōmānōs tardāvit.
Tigrānēs misericordiā permōtus rēgem afflīctum [= perculsum] ērēxit et perditum recreāvit [= cōnfīrmāvit].
Mercātōrēs quī in Asiā negōtiantur magnōs quaestūs faciunt. Asia enim prōvincia tam opīma [= opulenta] est ut ūbertāte agrōrum et varietāte frūctuum [= frūgum] aliīs prōvinciīs antecellat.
Multae mercēs ex Asiā exportantur. Equitēs Rōmānī quī vectīgālia exercent pūblicānī appellantur.
Hieme mare nōn est tempestīvum ad nāvigandum. Scientia reī mīlitāris imperātōrī necessāria est.
Nēmō tam impudēns est ut locum religiōsum [= sacrum] polluat.
Synōnyma: lābēs et macula; clēmentia et mānsuētūdō; sententia et opīniō;
querēlla et querimōnia; īnsōns et innocēns; horribilis et taeter;
prōvocāre et lacessere; arbitrārī et opīnārī; sānāre et medērī;
reminīscī et recordārī; obsequī et obsecundāre et obtemperāre; valdē cupere et concupīscere;
īrātus fierī et īrāscī; vetus fierī et inveterāscere.
Contrāria: quaestus et sūmptus; commodum et incommodum; solitus et īnsolitus; grātus et ingrātus; forte et cōnsultō.